Aldeia 53 Iha Covalima Kontinua Toba ho Lampuriña

  • Whatsapp
Sentral Eletrisidade iha Hera
Sentral Eletrisidade iha Hera. Foto Tempo Timor.

Tempotimor (Covalima)-Komunidade husi aldeia 53 iha Munisípiu Covalima kontinua uza lampuriña iha tempu kalan, tanba hahú Timor-Leste deside sai hanesan nasaun to’o agora aldeia sira ne’e seidauk iha direitu ba asesu eletrisidade.

Tuir xefe departementu electrisidade Covalima Antoni Mali katak, munisípiu Covalima tomak iha aldeia 53 ne’ebé to’o agora seidauk asesu liña eletrisidade, maibé EDTL munisípiu kontinua esforsu inklui haruka karta ba diresaun nasionál atu rezolve preokupasaun komunidade ninian.

“Iha 2020 ne’e, loloos suku tolu mak atu asesu ona eletrisidade, maibé iha nasionál orsamentu falla, entaun to’o agora suku sira ne’e seidauk asesu eletrisidade, ne’ebé ba tinan 2021 ne’e ita hein de’it, bainhira mak aldeia 53 bele asesu eletrisidade,” dehan António ba www.tempotimor.com iha nia servisu fatin, Sesta (12/2).

Nia afirma EDTL Munisipiu Covalima nafatin esforsu hodi husu tuir ba preokupasaun komunidade iha aldeia 53 ne’e, tanba ami labrle fó desizaun só nasionál mak deside.

“Ami ne’ebé servisu iha EDTL Munisípiu labele foti desizaun, só ami iha kompeténsia mak halo koordenasaun no halo karta ba sira iha diresaun nasionál para oinsa parte relevante sira bele responde ba komunidade sira-nia halerik durante tinan barak nia laran,” katak Nia.

Nia tenik, munisípiu Covalima iha postu hitu kompostu husi suku 30 aldeia 148, maibé aldeia 95 mak asesu ona eletrisidade maibé aldeia 53 mak seidauk asesu. Nune’e, aldeia sira ne’ebé seidauk asesu eletrisidade maioria iha postu Suai, depois tuir postu Fohorem, Fatululik, Zumalai, Maucatar, Tilomar no Fatumea.

Entretantu observasaun www.tempotimor.com iha terenu nota katak Munisípiu Covalima iha postu administrativu balun riin eletrisidade nian instala hotu ona, maibé komunidade seidauk bele asesu, tanba to’o agora governu seidauk halo pagamentu ba kompañia ne’ebé kaer projeitu refere.(*)

Related posts