Tempotimor (Covalima)-Governu liuhusi Ministériu Saúde (MS) hahú lansa no implementa tan vasina AstraZeneca ba autoriedade munisípiu Covalima nian, nune’e bele prevene virus Covid-19.
Liuhusi diskursu administradór munisípiu Covalima Francisco de Andrade husu ho obrigatóriu ba funsionáriu sira atu simu vasina, tanba kazu pozitivu iha munisípiu Covalima sa’e ona ba na’in 33.
“Hanesan funsionariu servi ba estadu no ba imi-nia família tomak, bele hola parte vasinasaun ida ne’e, nune’e ita Covalima sai husi situasaun ida ne’e no ha’u husu mós nai administrdor postu sira atu kolaborasaun servisu di’ak ho ita-nia ekipa saúde sira, nune’e programa ne’e bele susesu nomós ba funsionáriu sira ne’ebé lakohi vasina fó naran ba administradór,” dehan Administradór Francisco ba www.tempotimor.com iha salaun administrasaun Covalima, Sesta (16/4).
Iha tempu hanesan Diretór Diresaun Servisu Saúde munisípiu Covalima Filipe Perreira Lemos katak, lansamentu loron dahuluk ba vasina astrazaneka ne’e ba Autoridade administrasaun munisípiu no komandante PNTL Eskuadra sira inklui pesoál saúde sira.
“Ohin primeiru dia halo lansamentu ba vaksinasaun astrazaneka ba diretór/a sira nomós komanadante PNTL munisípiu no funsionáriu saúde sira hamutuk hamutuk na’in 24,” katak nia.
Entertantu autoriedade munisípiu Covalima nian ne’e mós husu ba komunidade sira iha Covalima labele tauk no trauma atu simu vasinasaun astrazeneca.
“Tanba ita la mate ba vasinasaun ne’e, ne’ebé husu ba ita boot sira tenki hakbesik an ba sentru saúde ne’ebé besik”. (*)
