Tempotimor (Covalima)- Maske pesoál saúde ida tenke fakar ran iha kampu batalla hasoru Covid-19 ne’ebé atu estraga nia sidadaun, maibé nafatin afirma pozisaun katak hadomi sidadaun laiha rohan.
Relasiona ho dezentendimentu ne’ebé akontese iha karantina Aeroportu Kayrala Xanana Gusmão Holbelis no Karantina Bairru Kosta ne’ebé rezulta médiku jerál Juvelino D. C. de Jesus tenke fakar ran, maibé tanba hadomi knaar, sidadaun nafatin sira nia fuan.
Portavoz Pesoál Saúde Covalima (PSC) Abertina Barros de Jesus husu estudante no pasajeiru sira ne’ebé desloka husi kapitál Dili ba Munisípiu Covalima tenke koopera ho pesoál saúde PNTL, F-FDTL sira, nune’e iha virus karik labele lori to’o familia, maibé hamate de’it iha dalan klaran.
“Ami husi AMTL, APTL no AETL seidauk hanoin aat ba imi, Maibe tanba domin ba imi no ba Família maka ami sakrifika ami-nia aan hodi atende imi,” dehan portavoz ne’e liuhusi konferénsia imprensa ne’ebé hala’o iha Karantina Kayrala Xanana Gusmão Holbelis, Tersa (20/4).
Portavoz ne’e mós konta kronolójia ba akontesimentu ne’ebé rezulta pesoál saúde iha kanek katak, aktu hakanek pesoál saúde ne’e akontese iha dia (19/4) iha tuku 18.00.
“Iha dia (18/4) ekipa vizilánsia munisípiu Covalima foti amostra teste PCR ba pasajeiru sira iha karantina Polo hamutuk na’in 32, ne’ebé kompostu husi feto 11 mane 21. Ikus mai feto ida no mane ida hetan rezultadu komfirmadu positivu ba SARS COV-2. Nune’e ekipa vizilánsia atu konfirma lolos identidade husi pasajeiru iha karantina Polo, maibé sira lakohi koopera hodi sira halibur hamutuk iha sala ida de’it hodi xave odamatan husi laran hodi hakilar dehan, Ami la sai, ami la fiar pessoal saúde sira, Covid-19 né bosok ten,” konta Albertina.
Nia mós dehan, estudante sira hatudu asaun agresivu tuku no tebe vidru janela nia rahun hodi kona médiku ida no kanek iha parte oin.
“Nia hala’o hela ninia kna’ar no hamrik besik janela, depois rezulta médiku kanek, entaun bainhira kanek ona, husi pasajeiru na’in 32 ne’e laiha argumentu hodi nonok no la halo buat ida,” porta-voz hateten
Maske nune’e, nu’udar ema pesoál saúde sira sente triste no kondena tebes ba hahalok brutalismu husi pasajeiru sira ne’e. (*)
