Lafaek tata komunidade na’in-rua iha Suailoro

Foto Suplay

Tempotimor (Covalima)-Hafoin komunidade sira hala’o atividade baibain liuhusk peska iha dader mak lafaek tata komunidade na’in-rua iha tasi área Suailoro.

Tuir Emiliano Cardoso (75) nu’udar vítima esplika kronologia akontesimentu lafaek tata nia katak, iha dadersan ba kaer kadiuk iha ponte okos mak lafaek ataka nia.

“Ha’u ohin dadersan mak ba kaer kadiuk iha ponte okos derepente avo lafaek mai tata ha’u-nia ain karuk no ha’u atu halai baku tan ha’u-nia moris fatin, entaun ha’u tuku nia ulun hodi salva-an nomós la mai, entaun ha’u halai sai mai liur mak hakilar ba ha’u-nia oan sira mai foti ha’u lori mai uma ne’e”, hateten ba jornalista www.tempotimor.com, tersa (27/04).

Iha okaziaun ne’e xefe suku SuaiLoro postu administrativu suai, Martinho Mendonça hateten, durante semana ne’e nia laran lafaek tata ona ema na’in rua iha suku Suailoro aldeia Mane ikun.

“Iha sabadu kalan ne’e tata ida tan katuas ida ho naran Fransisco Bere ne’ebé tata nia iha nia natar laran, ne’ebe hakoi iha loron domingu ne’e, ohin tata tan tiu Emiliu Cardoso iha ponte okos, nia kaer hela kadiuk, ne’ebé ami husu ba governu relevante sira se bele tau lafaek ne’e iha nia fatin ida hodi asegura komunidade sira iha suku suailoro, tanba tempu hanesan ne’e lafaek sai ba natar no mota ki’ik sira ne’e hodi ameasa ba komunidade nia vida,” hatete nia.

Autoridade lokál husu ba governu relevante, atu halo fatin ba lafaek sira iha Suailoro hodi labele ameasa ba komunidade sira iha suku suailoro postu administrativu suai munisipiu Covalima. (*)

Related posts