Tempotimor (Covalima)-Administradór postu Fatumea, Munisípiu Covalima, Filomino Cardoso hatete, autoriedade organiza komunidade funsionáriu públiku, estudante no parte seguransa hodi hadi’a estrada ne’ebé kotu, tanba Covalima iha serka sanitária ba Covid-19, maibé estrada mós la fó fatin hodi komunidade liu ba mai.
Administradór ne’e dehan, povu Fatumea serka husi Covid-19, povu sofre mós ba estrada ne’ebé kotu iha fatin-fatin, tanba impede movimentasaun ema, sasan no transporte ba mai postu.
“Povu Fatumea vítima ba serka sanitária liga ho moras Covid-19 no tuir mai mak problema estrada kotu iha fati- fatin, hanesan iha postu Tilomar no postu Fatumea hodi difikulta ami iha postu Fatumea, labele halo movimentu no labele ba postu seluk no labele asesu merkadu,” dehan Administradór Filomeno ba www.tempotimor.com, Sábadu (8/5).
Liga ho situasaun ne’e administradór husu tulun ba emprezáriu no ema Fatumea oan sira hodi apoiu ai-han ba komunidade ne’ebé halo reabilitasaun ba estrada sira ne’ebé kotu.
Iha fatin hanesan, xefe suku Belulik leten, Quintino José Amaral dehan, estrada ne’ebé kotu fó impaktu ba ekonomia komunidade nian, tanba presu nesesidade bázika sa’e.
Entertantu estrada sira ne’ebé liga postu rua ne’e kotu iha fatin neen, ne’ebé fatin tolu iha postu Tilomar no fatin tolu seluk hola parte ba postu Fatumea. Tanba laiha intervensaun husi Ministériu Obras Públika munisípiu Covalima no nasionál, mak komunidade sira iha inisiativa rasik hodi hadi’a.(*)
