Tempotimor (Covalima)-Liga ba inundasaun no deszatre naturais ne’ebé akontese iha fulan Abril liubá afeta ba to’os no natar na’in sira iha Covalima tanba kuaze hektares 37 mak hetan estragus.
Tuir Diretór Servisu Agrikultura Munisípiu Covalima (DSA-MC), Zeferino Amaral Guterres katak, iha trimestre dahuluk tinan 2021 nian, seitór agrikultura munisípiu Covalima nia produsaun tun, tanba impaktu husi inundasaun no destreza naturál ne’ebé akontese iha fulan abril nia laran, tanba estraga kamunidade sira-nia batar no natar kuaze hektares 37.
“Lista husi extensionista husi postu administrativu hitu iha munisípiu Covalima, ne’ebé sira hatama ba fulan janeiru to’o marsu fó impaktu duni ba komunidade sira-nia to’os hanesan hare, batar no plantasaun iha munisípiu Covalima, hamutuk hektares 37,35,” dehan Diretór Zeferino ba www.tempotimor.com iha nia knaar fatin Suai, Segunda (10/5).
Nia afirma, dadus ne’ebé extensionista sira aprezenta ba iha agrikultura munisípiu Covalima nian hatudu katak, komunidade maioria mak sofre ba inundasaun ne’ebé akontese iha fulan abril liubá.
“Dadus ne’ebé extensionista ho tékniku sira rekolla hamutuk natar na’in iha Covalima hamutuk 134, to’os na’in hamutuk 52. Entaun estragus husi inundasaun ne’e hamutuk hektares 37,35 iha Covalima,” hateten Nia.
Entertantu diretór ne’e mós husu komunidade to’os no natar na’in sira atu kontinua servisu hodi atinji servisu objetivu to’os no natar na’in nian, nune’e labele depende ka simu hahan importasaun husi rai liur.(*)
