Pesoál Saúde Ida Pozitivu Covid-19 iha Suai, SIJK Sidauk Evakua ba Izolamentu

Tempotimor (Covalima)-Pesoál Saúde ho inisiál AG deteta pozitivu Covid-19 iha postu administrativu Fatululik, maibé to’o agora ekipa Sentru Integradu Jestaun Krize (SIJK) seidauk evakua ba izolamentu.

Ho kazu ne’e, komunidade Fatululik lamenta tebes ho servisu SIJK munisípiu Covalima, tanba to’o agora pasiente Covid-19 iha postu administrativu Fatululik seidauk hetan evakuasaun.

Read More

“Ha’u reprezenta komunidade postu Fatululik lamenta tebes ho servisu saúde munisipiu Covalima, tanba parteira ne’e hetan pozitivu Covid-19 horikalan, maibé ate agora sei auto karantina iha nia uma hamutuk ho nia família sira iha aldeia Beko suku Fatululik, ne’ebé ami tauk tebes, tanba ne’e impaktu maka’as ba ami no ba komunidade sira ne’ebé hela viziñu sira,” dehan pesoal Suku FatuLulik, feliz Vicente ba www.tempotimor.com liuhusi via telefone, Sábadu (15/5).

Nia afirma, parte autoridade suku informa ona ba munisípiu desde horikalan maibé to’o agora ambulánsia husi munisípiu seidauk halo evakuasaun ba pasiente refere.

“Horikalan kedas parte autoridade lokál hato’o ona ba munisípiu Covalima no xefe sentru saúde postu, maibé ágora seidauk mosu anbulansia ida, ne’ebé oras ne’e dadaun parteira ne’e sei hamutuk ho nia oan no familia sira iha uma,” hateten nia

Entertantu relasiona ho parteira ida komfirmadu pozitivu Covid-19 ne’e jornalista www.tempotimor.com koko konfirma ho xefe sentru saúde postu administrativu fatuLulik, liuhusi telefone, maibé problema rede komunikasaun entaun la hetan klarifikasaun husi parte saúde Fatululik nian.

Alende ne’e jornalista www.tempotimor.com kontinua ho Diretór Servisu Saúde Munisipiu Covalima, Filipe Pereira Lemos, maibé diretór okupadu.(*)

Related posts