Tempotimor (Covalima)- Governu liuhusi Protesaun Sivil hamutuk ho ekipa Cruz Vermelha Timor-Leste (CVTL) Covalima apoiu ona vítima inséndiu iha Suku Matai, Postu-administrativu Maukatar, Munisipiu Covalima.
Tuir pesoál suku Matai Nunu José M. Perreira ba www.suai.tempotimor.com liuhusi via telefone katak, ekipa governu liuhusi protesaun sivíl no Cruz Vermelha Timor-Leste (CVTL) Covalima apoiu ona sasan bázika ba vítima Elsa Maria de Jesus ne’ebé nia uma ahi han mutuk iha tersa 18 Fulan-maiu tinan 2021.
“Horseik husi ekipa protesaun sivíl hamutuk ho CVTL munisípiu Covalima mai ajuda ona vítima ne’ebé ahi han nia uma iha horseik kalan, hanesan aihan bázika, roupa no sasan dapur nian iha suku Matai, aldeia Halihun,” dehan pesoál suku ne’e ba jornalista www.tempotimor.com liuhusi via telefone Kuarta (19/5).
Iha sorin seluk vitima Elsa Maria de Jesus agradese ba apoiu ne’ebé ekipa protesaun sivíl no CVTL Covalima.
“Agradese tebes ba apoiu mai ha’u, tanba hodi sustenta netik família uma laran iha tempu hanesan ne’e, maibé ha’u husu ajuda nafatin ba parte relevante sira atu ajuda mós matéria o uma nian mai ha’u hodi nune’e ha’u bele halo uma,” Elsa dehan.
Entertantu apoiu husi protesaun sivíl no CVTL munisípiu Covalima ba vítima inundasaun ne’e mak hanesan fos karon rua, sardina kaixa ida, sedap kaixa rua, biskuit, susu-been, sasan dapur nian inklui bebe nia ropa. Kona-ba materiál kontruksaun uma-nian sei hein nia prosesu tuir mai.
Entertantu inséndiu ne’ebé mosu ba vítima Elsa Maria de Jesus ho nia familia ne’e akontese iha tersa (18/5) madrugada maizumenus tuku 02:00, ne’ebé hetan kedas atuasaun husi parte bombeirus no autoriedade lokál sira, maibé la konsege salva sasan vítima sira-nian.(*)
