Prizoneiru no Guarda Prizaun Suai Hamutuk 52 Pozitivu Covid-19

Tempotimor (Covalima)-Tuir diretór interinu prizaun Suai, Augusto Humberto dos Reis katak, númeru pozitivu Covid-19 sa’e maka’as iha prizaun Suai, maibé izolamentu mak sai problema, tamba guarda prizaun na’in 10 ho prizoneiru na’in 42 maka pozitivu ba Covid-19.,

“Agora dadauk kazu pozitivu ne’e sa’e maka’as iha prizaun Suai, hanesan doutór sira esplika katak, guarda de’it na’in 10 maka pozitivu ona inklui prizoneiru na’in 42, tamba ne’e ami nia prokupasaun maka oinsa bele prepara fatin izolamentu, maibé ami halo ona alternativa ida hodi prepara bloku rua, atu bele izola sira ne’ebé pozitivu, depois ba sira ne’ebé negativu ne’e ami sei buka meiu oinsá bele asegura sira,” dehan Diretór Interinu prizaun Suai Augusto ba www.tempotimor.com, Kuarta (19/5).

Read More

Augusto hatutan, parte prizaun Suai sei halo kordensaun ho parte saúde, tamba saúde maka bele fó médida kona-ba asaun ne’ebé bele prevene sira seluk, nune’e labele da’et ba prizoneiru sira seluk.

“Ami só halo liña koordenasaun ho saúde, tamba sira maka hatene liu kona-ba, asaun saida mak ita bele halo, atu nune’e númeru pozitivu ne’e labele sa’e tan ona,” dehan Augusto.

Hatan ba preokupasaun ne’e, vise Koordenador ba Pilar Prevensaun no Mitigasaun Surtu Covid-19 iha munisípiu Covalima José Monis katak, loloos ema ne’ebé pozitivu tenke lori ba izolamentu ne’ebé prepara, maibé prizoneiru ne’ebé pozitivu iha prizaun Suai, labele ba izolamentu tanba servisu ministérial la autoriza lori prizoneiru ba izolamentu.

“Iha Prizaun Suai ne’e pozitivu aumenta bei-beik, tuir loloos ema ne’ebé pozitivu ita lori ba izolamentu ne’ebé adekuado, maibé ida ne’e hanesan Prizoneiru entaun difikuldade ba maluk guarda sira atu husik prizoneiru sira atu lori ba Izolamento ne’ebé iha, maibé ami esplika ona ba sira atu halo nafatin prevensaun atu nune’e labele aumenta tan númeru pozitivu Covid-19,” Hateten Nia

Entertantu totál guarda prizaun iha Suai hamutuk 42 no na’in 10 maka pozitivu ba Covid-19, no prizoneiru iha prizaun ne’e hamutuk 101 husi totél kazu ne’e, deteta na’in 42 maka pozitivu ba Covid 19, inklui restu husi totál ne’e sidauk fó sai hotu rezultado.(*)

Related posts