Tempotimor (Covalima)-Komunidade Covalima iha vontade hodi diversifika ekonómia familia liuhusi halo natar, maibé problema iha irigasaun, nune’e natar hektar sanulu iha suku Suailoro,Ppostu administrativu Suai, Munisípiu Covalima hetan estragus totál tanba udan been mós para ona durante fulan tolu.
Natar na’in, Armando Soares husi aldeia Mane Ikun, suku SuaiLoro hatete, bainhira hare sira ne’e kuda hotu ona, udan mós para inklui bee husi mota tafara mós menus.
“Ami kuda hare hotu tiha, udan been laiha no ami ba mota Tafara mós bee menus, ne’ebé bee la to’o mai ami-nia natar ne’e, ne’ebé ágora dadaun rai maran estraga ami-nia hare, ne’ebé hare sira iha ne’e loron matan kona namlaik hotu inklui rai nakfera mesak boboot iha natar laran hodi estraga hare,” dehan Armando.
Komunidade ne’e dehan, natar ne’ebé pertense ba nia hektares ida de’it, maibé hamutuk ho sira seluk ne’ebé halo natar iha área refere hamutuk hektare sanulu resin.
“Ha’u-nia natar hektares ida deit, ami iha ne’e hamutuk kala hektares sanulu resin iha suku Suailoro mak la hetan bee. Bee mai mós ami hadau malu maka’as, ne’ebé ami triste tebes tanba ne’e ami husu ministériu relevante hodi bele buka solusaun oinsa bee ne’e mai hodi aguenta ami-nia hare ne’e,” Nia dehan.
Iha fatin hanesan, komunidade Simão Seran mós espresa nia sentimentu triste, tanba udan been la mai fulan tolu ona, nune’e hare sira hetan estragus hotu.
“Ami-nia hare agora bee laiha no hare sira komesa maran, rai komesa kuak boot, tanba bee laiha, depois bee husi mota mós mai la to’o, bee menus tebes mai iha ami natar ne’e no balu komesa estraga husi peste no hare balu komesa maran no mutin dadadun ona,” katak nia.
Entretantu to’o notísia ne’e publika, ekipa www.tempotimor.com seidauk komfirma ho diretór Servisu Agrikultura munisípiu Covalima nian tanba iha loron Domingu.(*)
