Tempotimor (Covalima)-Organizasaun Populór Trabailladór Timor (OPTT) kolleta ona hare hektares 12 iha Aldeia Halik, Suku Beco, Postu administrativu Suai, Munisípiu Covalima.
Tuir Prezidente OPTT, Ivo de Jesus Sequeira katak, objetivu halo asaun kooperativa produtu alimentár iha rai laran, tanba hanoin katak Timor-Leste labele depende no simu importasaun husi rai liur.
“Koilleta hare hektares 12 ne’e, tanba fatin ne’e rai bokur no iha potensialidade iha produtivu tebes, entaun ita tenki potensializa, ita presiza intensifika no diversifika hodi nune’e ita bele hasa’e kresimentu aihan iha rai laran,” dehan Ivo ba www.tempotimor.com husi via telefone, Domingu (23/5).
Nia dehan, rai ne’ebé iha poténsia ba agrikultura, labele abandona, tenki halo servisu, tanba ne’e iha suai ita halo natar. Tanba realidade mak iha kapitál Dili, husik rai bokur nune’e hamosu hamlaha.
Prezidente OPTT ne’e mós husu ba governu halo iha kooperasaun di’ak ho OPTT, nune’e diversifika ekonómia iha rai laran, liuhusi seitór agrikultura.
“Husu ba estadu, govenu, veteranus, parte igreja nomós timoroan sira ne’ebé hasai kursu avansadu iha rai liur, liliu ba timiroan sira ne’ebé hanorin estudante univesidade atu servisu hamutuk ho OPTT, atu hametin no haburas ekonomia nasaun nian,” hateten Nia.
Prezidente ne’e mós dehan, husi kolleta hare ne’e nia rezultadu balu rai iha armajen, balu hela ba fini, balu fahe ba kbi’it laek sira no balu nakfilak ba osan.(*)
