OPTT Husu Sidadaun TL Lalika Hakilar Hamlaha Iha Dili

Prezidente Organizasaun Popular Traballadór Timor (OPTT), Ivo de Jesus Sequeira. Foto Suplay

Tempotimor (Covalima)-Prezidente Organizasaun Popular Traballadór Timor (OPTT), Ivo de Jesus Sequeira husu sidadaun Timor-Leste (TL) ne’ebe hela iha Dili tenke fila ba ida-idak ninia munisípiu halo to’os no natar, la’ós hela iha Dili depois hakilar hamlaha ba governu.

Nia dehan, sidadaun sira ne’ebé hela iha Dili, labele hakilar ba ba governu katak hamlaha, labele hein deit estadu, maibé liman tenke book aan hodi tama natar no to’os.

“Husu estadu, governu no ba maluk sira hotu ne’ebé iha Dili, ohin fó osan, fo fos ba komunidade sira, maibé semana oin sei hamlaha fali, ne’ebé ba maluk sira ne’ebé hela iha Dili lábele ezize ba governu, tanba ita Timor-Leste nia emblema RDTL ho batar no hare fulin, tanba ne’ebé tenki banati tuir,” dehan Ivo ba www.tempotimo.com, ohin (23/5).

Nia afirma, atu hadi’a povu Timor-Leste nia moris liuhusi halakon ki’ak, mukit no hamlaha.

“Atu hasai mukit ki’ak no hamlaha iha rai doben ida ne’e no kombate hamlaha naruk, hanesan ne’e mak ita Timoroan tenki dezenvolve ita-nia setór agrikultura nune’e bele hametin fali soberania aihan no hasa’e ita-nia seguransa alimentár iha RDTL ida ne’e,” hateten nia

Entertantu domingu semana kotuk Organizasaun Populár Traballadór Timor (OPTT) kolleta ona hare hektares 12 iha Covalima sei kontinua mós iha munisípiu seluk hanesan Baucau, Viqueque, Lautem no seluk tan. (*)

Notisia seluk