Tempotimor (Covalima)-Ospitál Referál Suai (ORS) sei la halo teste swab ba sidadaun ne’ebe hakarak ba Dili, tanba VTM teste Covid-19 menus ona.
Tuir Diretór Ospitál Referál Suai, Jose Moniz katak, hahú kuarta (26/5) parte Ospitál sei la halo atendementu ba sidadaun ne’ebe teste swad hodi ba kapitál Dili, tanba stock VTM menus.
“Loron ohin ORS labele halo teste Swap viajen ba Dili, tanba stock VTM teste Covid-19 menus, depois ohin mak foin ba foti iha kapitál Dili, ne’ebé oras ne’e dadaun iha dalan atu transporta mai Covalima,” Dehan Diretór ORS José ba www.tempotimor.com, ohin (26/5).
Nia akresenta, VTM swab sufsiente de’it ba pasiente sira ne’ebé atu mai konsulta iha ORS, tanba ema ne’ebé atu hetan asisténsia médiku tenke swab uluk.
“Stock VTM Covid-19 menus loos ona, ne’ebé, hodi atende de’it ba pasiente sira ne’ebé atu mai konsulta iha Ospitál Referál Suai, tanba ne’e mós ami tau prioridade ba sira, molok baixa ka antes konsulta ba sira-nia moras, ne’ebé stock sei iha oitoan ne’e, prepra ba pasiénte sira ne’ebé mai ospitál, karik VTM ne’e aban to’o iha ne’e ami kontinua fali teste swap ba sira ne’ebé atu viajen ba Dili,” katak Nia.(*)
