EMC Husu Autoridade Covalima Reativa Atividade Eskolár ba Finalista Sira

Diretor Edukasaun Munisipiu Covalima Edmundo Ferreira hato'o kestaun ne'e iha salaun Administrasaun Munisipiu Covalima. Tersa (1/6). Tempo Timor

Tempotimor (Covalima)-Diretór Edukasaun Munisípiu Covalima (EMC) Edmundo Ferreira husu autoriedade munisípiu Covalima atu reativa hikas atividade eskolár ba estudante finalista sira, tanba Serka Sanitária (SS) fó impaktu boot ba estudante finalista sira iha munisípiu Covalima.

Diretór ne’e sujere ba autoridade munisípiu no Sentru Integradu Jestaun Krize (SIJK) iha Covalima atu reativa hikas prosessu aprendisajem ba estudante finalista sira, nune’e sira bele hasoru exame nasionál ho di’ak.

Read More

“Atu reativa ensinu aprendisajem iha eskola ne’e fokus liu ba finalista sira husi primeiru síkulu, segundu síkulu, terseiru síkulu, atu nune’e ba oin sira bele hasoru exame nasionál ne’e ho di’ak. Sira ne’ebé la finalista ne’e nafatin suspende lai, ita ko’alia fokus liu kona-ba sira ne’ebé mak atu tuir ezame nasionál” Dehan Direktur Edukasaun Edmundo ba www.tempotimor.com iha nia knaar fatin Suai, Tersa (1/6).

Iha parte seluk, Administradór munisípiu Covalima Francisco de Andrade mós aseita atu reativa hikas prosessu aprendisajem ba estudante finalista sira, maibé nafatin tuir protokolu Organizasaun Mundial Saúde (OMS) nian.

“Ida ne’e di’ak, maibé prioridade liu ba finalista sira ne’ebé mak atu tuir ezame nasionál mai dadaun ona, depois sira tenke kumpri regras sira ne’ebé iha, no kada sala ida bele ema na’in sanulu de’it, maibé depende ba númeru estudante, depois lisaun ida tenke iha oras ida nia laran de’it,” Imforma ba Administradór Munisípiu Covalima Fransisco de Andrade

Entertantu liga ho preokupasaun hirak ne’e, Diretór Edukasaun Munisípiu Covalima hato’o ona ba Ministériu Edukasaun atu nune’e tempu badak bele reativa hikas prosesu aprendisajem ba finalista sira.(*)

Related posts