Tempotimor (Covalima)- United Nation International Children’s Emergency Fund (UNICEF) hatudu nia domin boot ba prizoneiru na’in-63 iha prizaun Suai, Munisípiu Covalima liuhosi apoiu fasilidade hijiene.
Fasilidade hirak ne’e entrega direita husi UNICEF entrega direita ba prizaun suai iha loron kuarta 02 Fulan-juñu tinan 2021.
Ho apoiu ne’e, Administradór Munisípiu Covalima, Francisco de Andrade agradese tebes, tanba UNICEF ho laran luak hatudu domin ba povu no rai ida ne’e.
“Agradese ba UNICEF hadomi povu Timor-Leste ne’ebé oras ne’e dadaun hetan Covid-19,no balé ajuda ho nia domin bo’ot ba maluk sira ne’ebé mak infrenta hela ba Covid-19 iha prizaun Suai”, Informa nia iha suai, kuarta (02/06).
Nia mós valoriza, apoiu hirak ne’ebé oferese la’os haree ba ninia kuantidade, tanba apoiu ne’ebé UNICEF fó hatudu iha duni domin ba Timor-leste, nune’e presiza agradese.
“Apoiu ne’ebé la bo’ot liu maibé ita boot sira labele haree nia kuantidade hare liu nia valor ne’ebé mak iha, tanba ne’e agradese tebes ba ita nia maluk sira iha UNICEF”, dehan nia
Iha fatin hanesaan, Diretór Servisu Saúde Covalima, Filipe Ferreira Lemos mós agradese ba Diretór prizaun Suai no prizoneiru na’in 63 ne’ebé afeita moras Covid-19, tanba bele hasoru-malu iha serimónia simples entrega fasilidade hijiene.
“Loron ohin ita bele hasoru-malu iha fatin ida ne’e mesmu que serimonia simples ne’ebé ita hala’o, tanba ne’e grasa maromak ninian no agradese tebes ba Diretór Prizaun Suai liu liu ba Prizoneirus na’in 63 ne’ebé pozitivu Covid-19 no na’in ida mak hetan rekoperadu ona”, nia agradese.
Nia enkoraja atu hotu-hotu nafatin vontade, espera bele kombate tranzmisaun lokál husi Covid-19.
Entertantu, dadaun iha prizaun Suai prizoneiru hamutuk ema na’in 111 husi númeru ne’e na’in 63 mak infetadu ba moras Covid-19 no ida konsege rekopera fali ona. (*)
