Tempotimor (Covalima)-Maski munisípiu Covalima durante ne’e iha hela Serka Sanitária (SS), maibé Servisu Rejistu Sivíl no Notariadu (SRSN) kontinua fó atendimentu ba sidadaun sira ne’ebé ba trata dokumentus urjente.
Diretór SRSN Covalima, António Sarmento katak, durante serka sanitária no estadu emerjénsia servisu rejistu sivíl no notariadu só atende de’it komunidade ne’ebé presiza urjente atu hetan dokumentus rejistu moris, óbitu, Bilente Identidade (BI) no pasaporte.
“Kada loron ami halo atendementu ba ema na’in sanulu, Maibé ba sidadaun sira ne’ebé presiza urjente de’it,” dehan Diretór SRSN Covalima António ba www.tempotimor.com iha nia knaar fatin, Sesta (4/6).
Diretór ne’e akresenta, husi janeiru to’o insísiu juñu tinan ne’e, SRSN hasai pasaporte ba sidadaun sira kuaze liu tolunulu.
“Pasaporte komun tolunulu resin, husi númeru ne’e sidadaun mane na’in sia, na’in 37 mak feto, entaun ida ne’e mak atendementu durante serka sanitaria, tanba ami hetan orientasaun husi dirijente jerál rejistu notariadu nasionál nian, ne’ebé durante ne’e atendementu públiku normál ami la atende, só ba sira ne’ebé nesesáriu tebes,” dehan Nia.
Entretantu, totál sidadaun ne’ebé husi janeiru to’o maiu servisu notariadu fó atendimentu hamutuk 569 inklui labarik tinan 12 ba leten. Maibé iha situasaun atendimentu ne’e, ekipa kontinua kumpri regras Organizasaun Mundiál ba Saúde (OMS) no Ministériu Saúde (MS).(*)
