Tempotimor (Covalima)-Programa Nasionál Dezenvolvimentu Suku (PNDS) apoiu osan rihun $22.748.41 hodi reabilita sede suku Fatululik no Taroman iha Postu Administrativu Fatululik, Munisípiu Covalima.
Manajer kompañia lokál Delta Mino, Alarico Teles, hatete, orsamentu rihun $20-resin ne’ebé PNDS apoiu hodi halo reablitasaun ba sede suku Fatululik maka ho totál $11.126.021 no sede suku Taroman ho totál $11.622.020.
Alarico afirma, kompañia ne’ebé manan tenderizasaun ba reabilitasaun sede suku ne’e hamutuk rihun $7.000 de’it, maibé hamutuk ho traballadór sira, entaun atinje to’o rihun $11.000.
“Totál osan husi PNDS hamutuk rihun $22 resin, suku Taroman mak bot liu, ne’ebé ami manan ba projetu ne’e ho montante orsamentu rihun $7.000-resin ne’e ba reablitasaun suku rua ne’e, kona-ba badaen ne’e ami kompañia la selu ka lahatene, sira husi PNDS mak hatene, tanba sira mak selu,” dehan Manajer Alarico ba www.tempotimor.com iha nia edifísiu, Sábadu (5/6).
Iha parte seluk, xefe suku Taroman Leonel Asa sente orgullu no agradese ba PNDS tanba reablita ona sede suku Taroman.
“Agrdese tebes ba PNDS tanba ho sira-nia orsamentu hadi’a ona ami-nia edifísiu suku nian, tanba durante ne’e uma refere kondisaun ladun di’ak ona no durasaun reablitasaun ne’e sira husi tékniku PNDS fó sai katak fulan tolu de’it,” tenik xefe suku Taroman ne’e.
Alende ne’e servisu na’in, Quintino da Cruz sente kontente tanba bele hetan oportunidade hodi servisu iha reabilitasaun ba sede suku ne’e.
“Ha’u reprezenta badaen sira sente kontenti tebes, tanba iha tempu serka sanitária no tempu difisíl hanesan ne’e, ami bele servisu halo uma ne’e no ami na’in haat kada ema ida hetan $200.00, tanba ami-nia servisu de’it mak hasa’e kuda-kuda, taka kalen no atu taka plafon inklui servisu seluk,” katak nia. (*)
