Tempotimor (Covalima)-Asosiasaun Rede Covalima (ARC) nu’udar rede advokásia ida iha nível munisipál ne’ebé kompostu husi Organizasaun la’ós Governu (ONG) halo sosializasaun ba komunidade sura kona-ba polítika inkuzivu Ema ho Defisiensia (EhD) iha suku tolu ne’ebé sai terjeitu.
Tuir Quintino Amaral Barros, nu’udar koordenadór ba kazu iha ARC katak, objetivu husi soaializasaun ne’e atu dezenvolve polítika inkluzaun ba Ema ho Defisiénsia (EhD) iha munisípiu Covalima.
“Objetivu enkontru ne’e atu dezenvolve polítika kona-ba direitu no inkuzivu ba ema ho defisiénsia oinsa atu fó hanoin ba komunidade sira para bele fó valór ba maluk difisiénsia sira,” dehan Koordenadór ne’e ba www.tempotimor.com iha sede suku Debos. Segunda (7/6).
Iha fatin hanesan, xefe suku Debos Agustino Da Silva husu ba sidadaun sira ne’ebé kondisaun normál bolu kolega defisiente ho respeitu, labele uza liafuan ne’ebé la merese ba sira.
“Ha’u husu ita-sira ne’ebé iha ne’e, hotu fila ba uma tenke fahe imformasaun ba vijinu sira, liliu ita-nia maluk sira ne’ebé kondisaun difisiente, tenke bolu ho respeitu, uza linguajem ne’ebé dignu bainhira bolu sira. labele bolu sira tilun diuk, matan aat, ain aat no bulak, tenke uza liafuan ne’ebé di’ak halo sira kontente,” katak xefe xuku Agostino.
Entertantu sosializasaun ne’e hala’o iha suku Debos, suku Taroman no Labarai, postu administrativu Fatululik, munisípiu Covalima.(*)
