PNDS Apoiu Orsamentu Rihun $51,108 ba Konstrusaun UKL iha Lalawa

Sefe Aldeia Ai-oan, Manuel Amaral hamutuk ho ekipa PNDS halo hela enkontru ho komunidade sira iha Aldeia Ai-oan, Sesta (11/06). Foto Tempo Timor

Tempotimor (Covalima)- Programa Nasionál Dezemvolvimentu Suku (PNDS) apoiu orsamentu rihun $51.108 ba konstrusaun Uma Kbi’it Laek (UKL) tolu iha Aldeia Ai-oan, suku Lalawa, Postu administrativu Tilomar, Munisípiu Covalima, sesta (11/06).

Sefe Aldeia Ai-oan, Manuel Amaral hatete, benefisiáriu ba programa uma kbi’it laek ne’e, kompostu husi faluk na’in tolu.

Read More

Nune’e, dadaun mobiliza ona traballadór hamutuk 32 ne’ebé kompostu husi Badaen na’in-12 no ajudantes 20 atu konstroi uma kbi’it laek ne’ebé sei implementa iha Fulan-jullu tinan 2021.

 “Aldeia Ai-oan mak sai alvu iha Suku Lalawa ba ema kbi’it laek na’in tolu, tanba ne’e ohin ha’u halibur komunidade sira iha ami-nia aldeia ne’e atu tau sira-nia naran hodi halo uma ba kbi’it laek sira,” dehan xefe Aldeia Manuel ba www.tempotimor.com iha Aldeia Ai-oan, Sesta (11/06).

Orsamentu ne’ebé apoiu husi PNDS sei aloka ba konstrusaun uma tolu no inklui selu Badaen ho ajudante sira.

“Osan hirak ne’e mak hodi selu ba badaen no ajudante sira ne’ebé servisu halo uma ba benefisiáriu na’in tolu ne’e, ne’ebé iha enkontru ne’e ha’u fó hatene kedas ba ha’u-nia komunidade sira kada uma ida foti ema na’in ida hodi halo servisu ba uma kbi’it laek ne’e,” Haktenik nia.

Entertantu Aldeia Ai-oan, Suku Lalawa iha totál populasaun na’in-698, ne’ebé kompostu husi xefe família hamutuk 157.(*)

Related posts