Tempotimor (Covalima)-Kada tinan Polísia Nasionál Timor-Leste (PNTL) munisípiu Covalima komemora loron Santo António ho komunidade sira, maibé tinan 2021 PNTL Covalima labele selebra ho ema barak, tanba pandemia Covid-19.
Tuir Komandante PNTL Covalima, Superintendente Polísia António Maria de Sá katak, tanba situasaun covid, entaun komemorasaun Santo António nia loron ba dala 18, hala’o de’it misa agradesimentu no simples.
“Ita iha hela pandemia nia laran, tanba ne’e ita partisipa iha misa agradesimentu iha igreja Avê Maria Suai oituan de’it, tanba ita haree ba regra distansiamentu sosiál, entaun partisipante sira la máximu, maibé importante mak ta-nia orasaun,” dehan komandante António ba www.tempotimor.com iha igreja Avê Maria Suai, Domingu (13/06).
Nia afirma, Santo António nu’udar mahein ba PNTL Covalima, nune’e kada tinan, sempre halo selebrasaun hamutuk.
“PNTL nia mahen mak Santo António, tanba ne’e tinan-tinan ami selebra loron Santo António nian ne’ebé monu iha loron 13 Juñu,” katak Nia.
Iha selebrasaun tinan 18 Santo António nian ne’e, Padre Carlos Gonçalves husu Santo António nia tulun ba PNTL atu servisu ho profesionál liután.
“Nafatin husu tulun hodi tau matan no akompaña ita-nia seguransa PNTL, hodi nune’e bele fó seguransa ba nia povu iha rai doben ida ne’e ho di’ak,” dehan Padre Carlos liuhusi nia omília.
Entretantu partisipante sira ne’ebé partisipa iha misa selebrasaun ne’e hamutuk na’in 150 ne’ebé mai husi amu parókia Avê Maria Suai, Padre Carlos Gonçalves, madre sira, estudante eskola sekundária Avê Maria Suai nomós membru PNTL munisípiu Covalima.(*)
