Tempotimor (Covalima)- Timor-Leste ukun rasik aan kuaze tinan 20 ona, maibé governu haluha instala eletrisidade ba komunidade rihun 1.658 iha Suku Lactos, Postu-administrativu Fohorem, Munisípiu Covalima.
Tanba, Munisiípiu Covalima iha suku barak mak asesu ona ba liña eletrisidade, maibé suku Lactos to’o agora seidauk.
Ho situasau ne’e, Xefe Suku Lactos, Antonio Afonsu hatete, komunidade sira sidauk sente ukun rasik aan Timor-leste nian, tanba laiha dezenvolvimentu ne’ebé di’ak.
“Tama tinan ruanulu ona, maibé komunidade suku Lactos seidauk sente ukun a’an, tanba até gora seidauk asesu elektrisidade”, nia informa www.tempotimor.com liu husi via telefone, tersa (15/06).
Planu atu instalasaun ba eletrisidade parte Eletrisidade Timor-Leste (EDTL) Munisípiu Covalima iha tinan 2020 ekipa halo ona Survei, maibé to’o agora laiha rezultadu ruma.
“Halo ona survei no Identifikasaun, maibé até a data lá iha responde ruma no parte ami Autoridade lokál mós hato’o bebeik ba iha postu no munisipiu, nafatin lá iha responde ate ágora”, nia afirma.
Tanba ne’e, nafatin ezije ba Governu liu-husi Ministériu Obrás Públikas atu fó atensaun ba komunidade sira nia preokupasaun.
“Tanba la asesu eletrisidade buat hotu falla, liliu ba sira ne’ebé mak estudante bainhira atu estuda kalan ne’e araska uza de’it solar panel no komunidade balu uza Gerador privadu”, nia lamenta.
Sorin seluk, reprezentante juventude Suku Lactos, Inaçio F. F. Niron mós sente triste tebes ho situasaun ne’ebé sira hasoru.
“Ha’u sente triste, tanba sá ida mak ami suku Lactos seidauk asesu eletrisidade, nia problema ne’e iha ne’ebé! mai identifika no survei tun sa’e mós até ágora la iha rezultadu, kona-ba estrada mós hanesan komunidade araska atu halo movimentu husi suku ba Postu”, Senti triste.
Entertantu, husi Suku Lactos mai Postu Administrativu Fohorem ho distánsia 6 kilometrus, laiha kondisaun dalan ne’ebé di’ak, entaun difikulta tebes ba komunidade atu lori produtu ba merkadu.
Suku Lactos Aldeia 4 hanesan Aulullik, Cacaut, Fatularan, Kalobor ho ninia xefi família 368, ne’ebé kompostu husi populasaun 1.658 no sira mós iha produtu potensia sira hanesan Koto, Talas, Aifarina, Kaffe, Kamí, Batar. (*)
