Tempotimor (Covalima)-Tuir Komandante Polísia Nasionál Timor-Leste (PNTL) Munisípiu Covalima, Superintendente, António Maria de Sá apela ba Covalimaoan atu labele fa’an ai-kameli ho ilegál, tanba identidade Timor-Leste nain inklui estadu bandu.
“It- nia riku soin hanesan ai kameli iha Munisípiu Covalima lakon barak, tanba ne’e foin lalais ita kaptura autór ne’ebé ta’a ai-kameli no agora aplika ona prizaun preventiva, tanba ne’e husu Komunidade sira iha Covalima kuidadu ho didi’ak, liliu mak iha Fronteira sira,” dehan Superintendente Polísia, António Maria de Sa ba www.tempotimor.com, Sesta (25/06).
Komandante ne’e afirma, Ai-kameli hanesan identidade Timor nian, tanba ne’e sidadaun sira labele fa’an ilegál, bainhira sidadaun sira fa’an ilegál ne’e krime, tamba ida ne’e estadu mak bele jere.
“Administradór no Autoridade lokál tenke servisu hamutuk ho ita-nia Ofisiál Polísia Suku (OPS) sira tenke tau matan ba ita-nia riku soin hanesan Ai-Kameli, ne’ebé agora dadaun ita iha no tenke kuidadu,” nia tenik. Entertantu Komandante PNTL Munisípiu Covalima mós husu ba autoridade lokál sira atu enkontru hamutuk OPS, tenke halo diálogu ho komunidade sira nune’e bele prevene.(*)
