Tempotimor (Covalima)-Organizasaun Conselho Popular Demokrátika-Repúblika Demikrátika Timor-Leste (CPD-RDTL) ezije ba estadu Timor-Leste atu anula tiha akordu ne’ebé TL halo ho Estadus Unidus Amérika (EUA) kona-ba reabilitasaun aeroportu Baucau.
Iha konferénsia imprensa, portavóz Rosalino da Conceição hateten, povu ki’ik hamutuk ho veteranus husi Diresaun Geral dos Kombatentes e Veteranus (DiGKOV) no UNIJMA/Ativista Pro-RDTL iha Fretilin-Movimentu ka Frente Ampla, diskorda totál akordu ne’ebé TL ho EUA asina iha loron 28 Juñu 2021, atu halo reabilitasaun aeroportu Baucau.
“Durante ne’e ami alerta dala barak ona ba ema sira ne’ebé kaer ukun sobre imperialismu nian tátika loloos, maibé sira lakohi rona no ikus mai kontenti de’it ho oferta gratuita ka ho liafuan aviasaun sivíl no dezenvolvimentu ekonómiku, nune’e sira asina akordu ho EUA nian embaixadór,” dehan Portavóz Rosalino liuhusi konferénsia imprensa iha Suai, Kinta (01/07).
Portavóz ne’e afirma, akordu ne’ebé TL halo ho EUA sai preokupasaun boot ba RDTL no povu maubere nian destinu iha futuru, tanba EUA falun hela nia planu real atu tau baze militár navál no forsa aero iha RDTL nia fatin estratéjiku ne’e.
“Buat ida ne’ebé perigozu tebes maka EUA ne’ebé ohin loron sadik ka provoka malu bei-beik ho paiz aziátiku balun hanesan Korea do Norte no poténsia aziátiku seluk ho kapasidade nuklear, wainhira funu boot ruma nakfera iha futuru, nia bele aproveita situasaun ne’e hodi apodera no instala ninia baze militar iha fatin estratéjiku ne’e, bele halo Timor-Leste sai alvu de atake ba poténsia beligerante seluk implikadu iha funu, hodi lori tan terus rohan laek ba povu maubere ho nia-oan sira, nune’e sei labele kompara ho dezemvovimentu ekonómiku saida de’it,” nia dehan.
Organizasaun ne’e nafatin ezije ba estadu atu anula kedas akordu ne’e no labele fó poder tomak ba Estadus Unidus Amerika, no sura mós revogasaun ba akordu SOFA ne’ebé kesi nafatin RDTL to’o ohin loron.
“Nu’udar alternativu mais justu kona-ba reabilitasaun aeroportu Baucau, di’ak liu fó ba paíz aziátiku ne’ebé fó laran tomak no la falun planu foer ruma, tuir lei-inan iha artigu 8 pontu 4, hanesan Rusia tanba nia ema mate no fakar ran tiha ona iha aeroportu Baucau iha tinan 2003 se la sala, ka enjeñaria mistu husi Xina ho Japão ne’ebé dadaun ne’e kaer ona infra-estrutura iha RDTL liu-liu ba parte Lorosa’e” Katak Porta Voz
Portavóz ne’e afirma, makaer ukun tenki hola konsiénsia kona-ba esperiénsia moruk tebes iha tinan 24 nian laran ne’ebé EUA sai arkitetu ba Indonézia nian hodi invade no okupasaun militar illegal ho bala mortifera hodi oho mohu povu maubere, maibé hafoin independénsia EUA mosu fali ho bala de açukar katak, ho osan dollar, oferta gratuita no seluk tan hodi hamihis RDTL nia independénsia no soberánia nasionál no tendénsia atu reabilita aeroportu Baucau.
Organizasaun ne’e mós bolu atensaun ba ukun na’in sira katak, bainhira ukun-na’in sira fó duni poder, maka mosu fali realidade seluk, hodi hamosu risku boot ba RDTL no povu maubere nia distinu iha futuru, nune’e ema ne’ebé asina akordu ne’e, tenki asumi responsabilidade todan.(*)
