Tempotimor (Covalima)-Sesta (02/07/2021) ohin autoriedade munisípiu Covalima taka ka halo ona dezmantelamentu ba Sentru Integradu Jestaun Krize (SIJK) iha Munisípiu Covalima.
Iha serimónia enxeramentu ba ezisténsia SIJK ne’e, Komandante SIJK, Kapitaun Xisto da Cruz katak, durante ne’e SIJK fó apoiu pessoál saúde no koordena ho autoridade Munisípiu to’o husi sentrál to’o iha aldeia hodi kombate Covid-19.
“Ohin ita hamutuk iha serimónia enseramentu ka retirada ba SIJK Munisípiu Covalima entaun SIJK nia ezisténisa hotu iha ne’e,” dehan Kapitaun Xisto ba www.temotimor.com hafoin dezmantela SIJK Covalima, Sesta (02/07).
Nia afirma, durante ne’e komunidade munisípiu Covalima laiha kazu óbitu ba Covid-19, tanba komunidade sira disiplina hodi kumpri regra Organizasaun Mundiál ba Saúde (OMS) no Ministériu Saúde (MS) nian.
Iha momentu hanesan Administradór Munisípiu Covalima (AMC), Francisco de Andrade dehan lori diresaun munisípiu Covalima nia naran agradese ba Kapitaun Xisto da Cruz ne’ebé durante ne’e lidera ona SIJK.
“Ha’u lori diresaun hotu nia naran hato’o apresiasaun ba kapitaun, tamba durante ne’e ita-nia hamutuk halo servisu ne’ebé di’ak tebes, hodi kombate moras ida ne’e, nomós karik durante atitude ruma la monu ita hotu nia laran ami husu deskulpa no lia menon mós ba kapitaun karik servisu iha fatin seluk, halo servisu didi’ak ba hanesan halo servisu iha munisípiu covalima,” dehan administradór ne’e.
Momentu hanesan administradór mós despede malu ho komandante SIJK munisípiu Covalima, Kapitaun Xisto da Cruz ne’ebé durante ne’e lidera ona SIJK iha pandemia Covd-19.
“Komandante servisu ho ita iha ne’e loron ikus ona, ha’u ho sekretária sei mantein, maibé ita-nia kapitaun ho instituisaun ne’ebé la hanesan. Tanba forsa menus rekursu nia tenke ba fali Díli hodi hetan servisu seluk,” dehan administradór ne’e.(*)
