Tempotimor (Covalima)-Polísia Nasionál Timor-Leste (PNL) munisípiu Covalima konsege rekolla koimas no konstribui ona ba kofe estadu hamutuk rihun $47,600.
Tuir komandante tranzitu munisípiu Covalima, Sarjentu xefe Patrício de Jesus katak, husi Janeiru to’o Juñu 2021, polísia halo servisu, tanba ne’e konsege halo aprensaun ba kareta no motorizada ne’ebé viola kódigu estrada.
“Iha fulan janeiru to’o juñu, ami prende motorizada hamutuk 568 no kareta 41. Sira kumpri hotu ona sira-nia dever hosi selu koimas ba estadu,” dehan Komandante ne’e ba www.tempotimor.com iha nia knaar fatin, Tersa (06/07).
Nia afirma, husi servisu PNTL nian mak konesge halo aprensaun ba transporte sira ne’ebé la oedese ba sinais tránzitu. Nune’e konsege rekolla koimas ba kofre estadu.
“Reseita sira ne’ebé ami hetan no hatama ba kofre estadu ne’e mai husi, prende motorizada ho veíkulu no sidadaun sira ne’ebé laiha karta kondusaun inklui dokumentu sira,” nia tenik.
Entertantu pólisia tranzitu Covalima mós rejista asidente no insidente husi janeiru to’o juñu hamutuk sia. Ne’ebé kazu hitu konsege rezolve tuir família, maibé kazu rua kontinua prosesu iha tribunál Covalima.(*)