Tempotimor (Covalima)-Tuir koordenadora Servisu Rejistu Verifikasaun Emprezariál Impreza Públika (SERVE,IP) sukursál munisípiu Covalima Maria Fátima Luísa de Araújo katak, husi tinan kotuk mai to’o agora, konsege rejistu no renova ona ho tipu negósiu oioin hamutuk 205.
“Presensa SERVE.IP husi fulan maiu 2020 to’o agora ami rejista ona emprezariál hamutuk 205 ne’ebé mak rejistu iha ne’e maiória negósiu no emprezáriu individual,” dehan koordenadora SERVE,IP sukursál Covalima Maria ba www.tempotimor.com iha nia knar fatin, Tersa (06/07).
Nia afirma, rezultadu husi renovasaun ba dokumentu sira negósiu maka konsege rekolla osan ba kofre estadu hamutuk rihun $3.273 dollar amerikanu.
“Osan hirak ne’e mai husi renovasaun ba atividades negósiu no kompañia risku baixu ka médiu altu selu tinan ida dala ida ho montante orsamentu $45 dollar amerikanu, nomós sertidaun rejistu komérsiu mós tinan ida selu dala ida ho total orsamentu $10.00,” katak Nia.
Entertantu funsionáriu ne’ebé servisu iha SERVE,IP sukursál munisípiu Covalima hamutuk na’in lima inklui koordenadora ne’ebé kompostu husi mane na’in tolu no feto na’in rua.(*)
