MSSI Covalima Apoiu Fos ba Vulnerável 216 iha Kamanasa

Familia sira hein hela iha sede suku Kamanasa hodi hein apoiu husi MSSI Covalima. Kuarta (07/07). Foto Tempo Timor

Tempotimor (Covalima)-Ministériu Solidadriedade Sosiál no Inkluzaun (MSSI) liuhusi Sentru Solidadriedade Sosiál Covalima servisu hamutuk ho administrasaun munisípiu apoiu ona fós ho marka CLN ba komuniadde vulnerável hamutuk na’in 216 iha suku Kamanasa.

Tuir diretór interinu SSSC, Ildeofonso da Costa Amaral, MSSI apoiu fós ba kamunidade 216 iha suk Kamanasa tanba kondisaun vulnerável.

Read More

“Liuhusi Sentru Solidadriedade Sosiál Covalima (SSSC) servisu hamutuk ho administrasaun munisípiu Covalima, hodi orienta xefe suku sira hodi foti dadus ba ema vulnerável sira, tamba ne’e maka ohin ami fahe ba ema vulnerável hamutuk 216. Tuir loloos 218, maibé na’in-rua simu ona fós parte husi difisiénsia nian,” dehan diretór interinu ne’e ba www.tempotimor.com, Kuarta (07/07).

Diretór  ne’e afirma, molok ne’e SSSC apoiu ona fós ba ema vulnerável hamutuk 376 iha postu Fohorem.

“Ohin hanesan faze segundu, tanba faze primeiru ami fahe iha postu Fohorem ne’e ema hamutuk 376, ida ne sura jerál iha suku sira ne’ebé lokaliza iha postu Fohorem,” katak Nia.

Administradór munisípiu Covalima, Fransico de Andrade katak, molok ne’e hamutuk ho diretór MSSI Covalima hasoru diretamente ho Ministra MSSI atuál Vise Primeiru Ministru Armanda Berta mak ohin familia vulnerável sira hetan ona apoiu husi governu.

“Iha fulan maiu Ministra MSSI mai Suai, ha’u ho diretór SSSC hasoru malu ho nia, Ha’u hatete ba nia katak, ami-nia ema ferik ho katuas no vulnerável iha Covalima susar liu ba aihan, tamba sira difisíl atu asesu ba merkadu, tamba ne’e maka ohin ita fahe ba imi ne’e,” katak administradór ne’e.

Alende ne’e xefe suku Kamanasa, Samuel Barros sente kontente ho apoiu husi governu hodi tulun ona komunidade vulnerável sira.

“Ha’u sente kontente tamba governu esforsu hodi fahe fós ba ami-nia komunidade vulnerável sira, ne’ebé ida ne’e maske sasan uitoan, maibé valór boot ba ami,” xefe ne’e haktenik.

Entertantu Sentru Solidariedade Sosiál Covalima posibilidade sei apoia tan familia vulnerável sira iha postu no suku sira seluk ne’ebé lokaliza iha munisípiu Covalima, maibé xefe suku sira tenke identifikasaun hodi halo karta pedidu ba MSSI iha Covalima ho dads ne’ebé loos.(*)

Related posts