Tempotimor (Covalima)-Haree ba virus Corona ho variante Delta ne’ebé invade dadaun nasaun viziñu Indonézia, mak Administradór Postu Administrativu Suai, Laurentino de Jesus husu seguransa atu asegura liña fronteira entre Covalima ho Indonézia.
“Ami autoridade lokál husu ba parte relevantes liliu segunransa Pólisia Nasionál Timor-Leste (PNTL) Munisípiu Covalima no F-FDTL sira labele tolera sidadaun sira husi Indonézia no hapara lai transporte publiku ne’ebé lori materiál konstrusaun no nesesidade báziku, tanba dadaun iha nasaun viziñu Indonézia lockdown total,” dehan adiministradór ne’e ba www.tempotimor.com iha nia knaar fatin, Kinta (08/07).
Adiministradór ne’e husu segunransa sira tenke kontrola máximu ba komunidade sira, tanba bainhira tolera beibeik maka moras variante Delta sei tama Timor-Leste liuhusi fronteira rai, entaun seguransa tenke másimu.
“Se ita la halo seguransa metin iha fronteira maka moras ne’e tama mai duni ita-nia fronteira, ne’ebé husu Seguransa sira ba se de’it mak hala’o aktividades arte marsiais nian iha Indonézia mak ultrapasa ilegál, tenke kaptura no prosesu kedas sira tama kadeia,” katak nia.
Nia mós fó referénsia katak, tinan kotuk Covid-19 mosu iha rai liur, maibé derpenti mosu iha postu Fatumea, munisípiu Covalima, tanba la prepra antes. Tanba ne’e bainhira Delta tama iha TL, sei satan la biban.
Entretantu to’o notisia ne’e publika, www.tempotimor.com seidauk halo konfirmasaun ho Komandante PNTL Munisípiu Covalima, Superintendente Polísia António Maria de Sá seidauk iha servisu fatin.(*)
