Tempotimor (Covalima)-Tersa (13/07/2021) lokraik, ekipa Juventude Covalima Taktikal Team no ekipa Rádiu Komunidade Cova Taroman (RCCT) halo adventure iha foho naran Fohorua ne’ebé hola parte suku Ogues, postu administrativu Maucatar, Munisipiu Covalima konsege hetan morteiru rua, ne’ebe ida belit hela iha rai laran no ida latan de’it.
“Ami na’in hitu ho kolega média rádiu komunidade Cova Taroman ho ami nia grupu ida naran Covalima Taktikal Team,Ami la’o-la’o derepenti hetan morteiru rua iha Fohorua parte suku Ogues nian, depois sei hakerek iha leten katak “sebelum tembak jangan dibuka”, dehan reprezentante juventude adventure, Martinho Gusmão Alves ba www.tempotimor.com iha, Kuarta (14/07).
Nia afirma, hafoin fila husi Fohorua, suku Ogues informa kedas situasuan ne’e ba eskuadra Pólisia Nasional Timor-Leste( PNTL) Munisípiu Covalima.
“Ami kalan toba iha ne’ebá dader ami fila hato’o kedas ba esuadra PNTL munisípiu Covalima, Depois husi PNTL sei hato’o relatóriu ba ekuipa nasionál kona-ba halo bom rabenta nian,” katak nia.
Entertatu ba kestaun ne’e www.tempotimor.com koko konfirma ho Komandante PNTL munisípiu Covalima, Superintendente Polísia, António Maria de Sá, maibé komandante okupadu ho servisu.(*)
