Tempotimor (Covalima)-Tuir Komandante Polísia Nasionál Timor-Leste (PNTL) munisípiu Covalima, Superintendente Polísia António Maria de Sá katak, bainhira CPD-RDTL hasa’e bandeira nasionál arbiru, PNTL sei atua.
“Komandu PNTL Covalima la autoriza ba atividade CPD-RDTL hasa’e bandeira nasionál iha loron bai-bain, só bele hasa’e bandeira nasionál iha loron nasionál, tanba iha situsaun estadu emerjénsia no hasa’e bandeira nasionál iha nia tempu la’ós naran hasa’e,” dehan Komandante PNTL Covalima ne’e ba www.tempotimor.com Ohin (23/07).
Nia afirma, durante ne’e PNTL Covalima bandu mak hanesan labele halibur ema barak iha estadu emerjénsia no labele hasa’e bandeira nasionál la’ós iha nia fatin.
“Loron nasionál bele komemora, maibé komandu bandu buat rua iha situsaun estadu emerjénsia mak hanesan labele halibur ema barak, tanba ne’e tuir lei no CPD-RDTL sira hasa’e de’it bandeira nasionál iha fatin tolu mak hanesan iha suku no postu administrativu no munisípiu no iha fatin seluk sei la tolera,” haktenik nia
Entertantu liga ba atividade CPD-RDTL ne’ebé atu hasa’e bandeira, komandu munisípiu Covalima la autoriza tanba atu hasa’e bandeira CPD-RDTL hamutuk ho bandeira nasionál.(*)
