Tempotimor (Covalima)-Ministériu Administrasaun Estatál (MAE) aloka ona orsamentu rihun $350 ba postu administrativu hitu iha Munisípiu Covalima ne’ebé kada postu administrativu hetan rihun $50.000.
“Programa Mão-de-Obra komesa implementa ona iha postu hitu iha munisípiu Covalima no orsamentu hirak ne’e administradór postu sira mak halo jestaun rasik hodi selu ba traballadór sira ne’ebé mai husi suku hodi hamos postu administrativu sira, tanba dalabarak sira apoiu de’it servisu ba munisípiu, ho ida ne’e mak programa MAE fó servisu ba administradór postu sira hodi halo,” dehan Sekretariadu administrasaun munisípiu Covalima, Afonso Nogeira Nahack ba www.tempotimor.com iha nia knaar fatin, Ohin (30/07).
Alende ne’e administradár postu Suai, Laurentino de Jesus orsamentu refere postu maka sei jere no xefe suku maka buka traballadór sira.
“Orsamentu rihun $50 mai iha nivel postu atu organiza ba servisu hodi hamos valeta iha área postu suai nian, depois totál orsamentu ne’e postu maka jere, xefe suku maka buka servisu na’in atu nune’e servisu bele la’o ho di’ak,” katak Laurentino.
Laurentino afirma, programa maun-de-obra ne’e, sei halo lansamentu iha loron 9 fulan Agostu tinan ne’e.
“Ohin ami enkontru ba dala ikus, ami nia grupu sira loos hotu ona, ne’ebé ohin ami traxa planu para atu nune’e loron 9 fulan Agostu ne’e bele halo ona lansamentu ba programa ida ne’e,” nia tenik.
Enterantu postu Suai kompostu husi suku lima ne’ebé ho nia traballadór kada suku na’in 20, nune’e suku lima ne’e traballadór hamutuk na’in 140.(*)
