Tempotimor (Covalima)-Traballador na’in 18 ne’ebé halo servisu ba konstrusaun izolamentu iha Ospitál Referal Suai (ORS) durante fulan tolu ona maibe kompañia Roman Junior seidauk halo pagamentu ba traballadór sira.
Ba kestaun ne’e, reprezentante traballador Raul da Costa Tilman sente triste tanba difikulta ba nesesidade loron-loron.
“Ami sente triste, ami mai buka osan ne’e tanba ezisénsia husi nessesidades uma laran nian, maibé kuandu la selu ami hanesan ne’e kan ladi’ak, ami-nia ferik-oan sira atu han saida?, ami mós presiza osan, tanba ami mai ne’e buka osan, depois ami servisu tiha durante fulan tolu la selu ne’e ami sente ladi’ak,” katak Raul ba www.tempotimor.com, iha ORS Covalima, Segunda (02/08).
Nia afirma, kestaun ne’e hato’o ona ba parte kompañia, maibé to’o agora laiha konsiderasaun.
“Ami hato’o ona ami-nia preokupasaun ne’e, maibé sira haruka ami hein de’it, maibé to’o agora mós la selu ami, pelumenus sira esplika netik mai ami osan ne’e tarde ga oinsá para ami bele hatene,” nia tenik.
Entretantu servisu na’in ne’ebé durante ne’e konstroi izolamentu ne’e hamutuk na’in 18, ne’ebé kompostu husi badaen na’in 7 no ajudante na’in 11.
“Tuir kontratu badaen iha $10.00 to’o $ 15.00 kada loron no ajudante kada loron dollar $6.00,” katak Nia.
Entretantu ba kestaun ne’e, www.tempotimor.com tenta konfirma ho diretór kompañia Roman Junior Unipesoal Lda, maibé laiha fatin, inklui konfirma husi via telefone, maibé la hetan atendimentu.(*)
Konstrusaun edifísiu izolamentu ba Covid-19 iha Ospitál Referál Suai hahu iha loron 24 fulan Setembru 2020 no remata iha loron 23 fulan Dezembru 2020 maibé dadaun ne’e obra refere seidauk remata tanba pandemia Covid-19 no totál orsamentu ba konstrusaun ne’e hamutuk $262,452.00 mill.(*)
