Tempotimor (Covalima)-Tuir Administradór Munisípiu Covalima (AMC), Francisco de Andrade katak, autoriedade Covalima diskute ona katak iha tinan fiskál 2022 projeitu tolunulu mak sai prioridade iha munisípiu Covalima.
“Antes ami atu ba halo debate iha Ministériu Administrasaun Estatál (MAE), presiza iha aprovasaun liuhusi konsellu konultivu ida ne’e, tamba ne’e ami sei debate iha loron 06 ho 07 depois loron 13 sei submete ba iha Ministériu Finansas (MF),” dehan Administradór Fransisco hafoin hala’o debate ho ekipa liña setrorál sira iha salaun administrasaun Covalima, Tersa (03/08).
Nia husu ba diretór liña setorál sira atu pro-ativu, atu nune’e fó hanoin ba malu kona-ba projeitu hira ne’ebé atu implementa ina tinan 2022 iha Covalima.
“Ita hotu pro-ativu hodi bele fó hanoin ba malu ne’e signifika ita atu hadi’a munisípiu Covalima ne’e, tamba Covalima iha ita-nia liman rasik, tanba ne’e ha’u presiza ita-boot sira-nia hanoin di’ak oinsa bele suporta ita hotu bele la’o ba oin,” katak Nia.
Entertantu munisípiu Covalima iha projeitu hatnulu mak prioridade ba tinan 2022, maibé husi debate ne’e projeitu 30 de’it mak passa, hanesan reablitasaun ba edifísiu postu administrativu balun nomós estrada sira ne’ebé liga ba postu no seluk tan.(*)
