Tempotimor (Covalima)-Administradór Munisípiu Covalima (AMC), Francisco de Andrade sente triste bainhira xefe Aldeia balun lakohi simu sasan ne’ebé husi grupu ka governu apoiu ba família vulnerável sira.
Ho situasaun ne’e, administradór husu ba autoriedade lokál sira liu-liu xefe aldeia sira labele sai opozisaun ba aihan ne’ebé grupu ka organizsaun inklui governu ne’ebé fó apoiu umanitáriu.
“Ha’u sente triste, tamba iha fulan hira liubá xefe aldeia balu maka lakohi simu sasan ne’ebé ema apoiu ho kuantidade oitoan de’it, ne’ebé hau husu ba imi labele sai opozisaun ba kualker ajudus ne’ebé iha, tamba ema ajénsia ruma atu fó sasan ruma tuir nia kapasidade, la’ós ita maka obriga fali ema,” dehan Administradór ba komunidade no autoriedade lokál sira iha Aldeia Fatuloro hafoin partisipa programa Centru Comunidade Covalima (CCC) halo lansamentu ba distribuisaun aihan báziku sira iha suku Taroman, Kuarta (04/08).
Administradór ne’e afirma, xefe aldeia hanesan membru governu iha baze, tamba ne’e buka maneira oinsa bele responde situasaun ne’ebé povu infrenta.
“Imi tenke esforsu hodi buka maneira oinsa maka bele responde situasaun sira iha aldeia ne’e, ne’ebé ita-boot sira sosiedade sivíl lori sasan mai aat ka di’ak ita-boot sira simu de’it, ita-boot sira tenke rona xefe suku sira,” katak Nia.(*)
