Tempotimor (Covalima)-Centro Comunidade Covalima (CCC) halo parseiru Give2 Asia-America no Belun ho Suai Covalima apoiu aihan bázika ba komunidade vulnerável ne’ebé afeta husi propagasaun Covid -19 iha Timor-Leste liu-liu komunidade iha munisípiu Covalima.
Diretor CCC, Alberto de Jesus hateten, objetivu lansamentu ne’e atu tulun família vulnerável sira iha área remotas, ne’ebé labele la’o ba fatin dook no impaktu husi Covid- 19.
“Ita atu tulun komunidade vulnerável sira ne’ebé dook husi kapitál munisípiu, hanesan ferik sira ne’ebé labele la’o dook labele ona, liga ho situasaun Covid-19 ne’ebé sira enfrenta,” katak diretór CCC Alberto ba www.tempotimor.com hafoin halo lansamentu ba distribhisaun aihan bázika ba familia vulneravél sira iha Fatululik, Kuarta (04/08).
Nia esplika, distribuisaun aihan bázika ne’e, CCC hetan fundus husi GiveTwo Asia no Belun of Suai ka Covalima iha Porphilips Australia.
“Programa distribuisaun ne’e mai husi fatin rua, ida doasaun husi GiveTwo to Asia ho montante $10.117,59 nomós Belun of Suai ka Covalima ho montante $2.471 ne’ebé total benefisiáriu ba apoiu ne’ehamutuk 220 husi aldeia 43 husi postu Fatululik, Tilomar no Fatume,” nia dehan.
Iha tempu hanesan benefisiarius Rezina da Conceição (+60) agradese ba CCC tamba ajuda ona aihan ba sira.
“Ami ferik ne’e kontente, tamba ami la’o labele ona, imi mai fahe fó ami hansa ne’e ami kontente no agradese ba imi,” dehan benefisiáriu Rezina.
Entretantu ohin ekipa CCC hahú apoiu ona aihan báziku sira hanesan fos, bimoli, supermi, fore-mungu no susu-been iha postu administrativu Fatululik ne’ebé ho totál benefisiáriu hamutuk 45, enkuantu postu rua seluk sei kontinua iha loron tuir mai.(*)
