Tempotimor (Covalima)-Sesta (06/08/2021) ne’e kareta mikrolet “Selvia Amor” ho xapa matríkula 38.506 hetan asidente iha área Bere-Metan, Salele boot, Suku Lalawa Postu Administrativu Tilomar ne’ebé rezulta estudante ida mate no na’in tolu kanek todan.
Tuir vítima Joselino Cardoso, kareta refere hala’i ho velosidade maka’as, entaun to’o iha kurva labele kontrola ikus mai hetan asidente.
“Kondutór halai maka’as, iha kurva labele kontrola maka kareta baku fila no ami iha kareta laran mesak estudante ami nain tolu mak hetan kanek todan no kolega ida mate kedas iha fatin akontesimentu,” dehan estudante Juselino ba www.tempotimor.com iha fatin akontesimentu, Sesta (06/08).
Iha fatin hanesan vítima João Rando Cardoso (15) mós afirma kataka, kareta refere halai ho velosidade maka’as.
“Ami sai husi eskola mak tuir kareta mikrolet ne’e tanba distánsia ba uma dook, maibé kareta halai maka’as liu iha kurva la hetan silu, entaun ami ho kareta hetan baku fila,” hateten nia
Entertantu jornalista www.tempotimor.com tenta atu komfirma ho komandante Polísia Transitu Munisipiu Covalima, maibé tránsito munísipiu Covalima sei halibur informasaun husi akontesimentu ne’e.
Observasaun www.tempotimor.com iha terenu nota katak, kareta mikrolet ne’e rasta vítima sira kuaze metru sanulu husi fatin akontesimentu nune’e rezulta estudante husi Eskola Bázika Filiál (EBF) Salele ida mate fatin, na’in tolu kanek todan no sira seluk kanek kaman.(*)
