Tempotimor (Covalima)-Haree ba virus Covid-19 ne’ebé mosu tan variante foun maka, ekipa servisu voluntáriu Rotaract Club Covalima (ROCCOV) kontinua apoiu aihan básika ba familia vulnerável inklui ema ho difisiénsia hamutuk uma-ka’in 16 iha aldeia Gala Suku Beco Postu Administrativu Suai.
“Ami-nia prinsípiu ne’e ba komunidade sira ne’ebé difisiente no vulnerável presiza tebes, tamba ne’e ohin ami distribui ona iha aldeia Gala ba Benefisiáriu 16, ne’ebé kada benefisiáriu ami fo fos kilo 10, Bimoli, Masin-Midar kilo ida, sabaun ho rinso no seluk tan,” katak Julio ba www.tempotimor.com iha aldeia Gala, Domingu (08/08).
Prezidente ROCCOV dehan, apoiu umanitáriu ne’e kontinua ba familia sira ne’ebé identifikadu ona iha postu sira.
“Ami sei kontinua fahe sasan ne’e ba familia sira iha postu administrativu Tilomar no Fohorem, haree liu ba komunidade sira ne’ebé vunerável tebes ho problema kondisaun fíziku,” Haktenik nia
Iha tempu hanesan benefisiáriu Artur Vicente sente kontente ho ajudus ne’e, tamba bele hakma’an ona situasaun ne’ebé enfrenta durante ne’e.
“Ami Kontente tebes no agradese tebes ba ekipa voluntáriu ne’ebé ohin fahe sasan mai ami, maske oitoan, maibé agradese tamba sira servisu ho voluntáriu, sira fó ami hodi responde netik ami-nia uma laran,” Artur espressa nia sentimentu.
Entertantu distribuisaun aihan báziku ne’e, Rotary Club of Dili Lafaek (ROCDLAF), hetan fundus husi Rotary District Governur iha Australia, hodi aloka ba Rotaract Club of Covalima ho montante orsamentu $500.00 dolar Amerikanu, ne’ebé iha uma-ka’in 16 mak benefísia husi apoiu ne’e.(*)
