UNIJMA Kolleta Kafe Hektares 12 iha Ainaru

Ekipa UNIJMA rekollaona rezultadu husi kolleta kafe iha Nunumoge, Postu Hatu-Builiku, munisipiu Manufahi. Tersa (17/08). Foto Tempo Timor

Tempotimor (Covalima)-Tersa-feira (17/08/2021) ne’e UNIJMA kolleta kafe hektares 12 iha to’os koperativa iha Aldeia Tukarau Suku Nunumoge, Postu Administrativu Hatu-Builiku, Munisípiu Ainaru.

“Ohin ita kolleta kafe iha to’os koperativa rejiaun Ainaru postu Hatu-Builiku, Suku Nunumoge ho objetivu atu kore depedénsia aihan importasaun husi rai liur. Alende ne’e iha mós koperativa kona-ba koto, batar, hare no aihan sira seluk,” dehan sekretáriu Uniaun UNIJMA Munisípiu Ainaru, João Reis ba média sira, Tersa (17/08).

Read More

Nia mós husu ba governu no estadu atu hapara ona importa aihan sira hanesan kafe, koto, batar, hare no aihan sira seluk husi rai liur maibé tenke sosa produtu ne’ebé povu kuda, inklui hasa’e folin kafe, nune’e bele motiva to’os na’in sira badinas liután kuda kafe no aihan sira seluk.

“Estadu labele fakar de’it osan ba rai liur, Tanba ita haree ita-nia povu sira iha rai ida ne’e kuda sasan barak, Maibé governu nunka sosa. Uluk programa ida dehan “Povu Kuda Governu Sosa” mas na realidade to’o agora mós governu la sosa tuir presu ne’ebé mak iha. Tanba ko’alia kona-ba kafe nia folin, kada kili ida sentavos $0.35, ne’e ita haree katak povu ne’e ki’ak tebes, se bele aumenta kafe nia folin,” Haktenik nia.

Entertantu ekipa UNIJMA ativista Pro-RDTL Munisípiu Ainaru, durante ne’e kolleta ona kafe hektares sanulu resin rua, koto hektares ha’at, ne’ebé tuir planu sei kolleta mós aihan sira seluk, ne’ebé grupu kuda batar, haree-rai-maran, fehuk-roupa no aihan sira seluk tan.(*)

Related posts