Tempotimor (Covalima)-Relasiona ho kondisaun Eskola Bázika Filiál (EBF) Aitos ne’ebé aat no menus ba fasilidade mak koordenadór EBF Aitos, Faustino Ferreira husu ba Ministériu Edukasaun Juventude no Desportu (MEJD) atu hadi’a eskola refere.
“Ministériu edukasaun mai haree tiha ona kondisaun eskola filiál ne’e, maibé kondisaun eskola ne’e aat nafatin, ami-nia eskola ne’e mós menus profesór, kadeira no meza ne’ebé ami husu karik bele ba tinan oin mai bele hadi’a netik ami-nia eskola ne’e,” dehan koordenadór EBF Aitos, Fausto ba jornalista www.tempotimor.com iha nia knaar fatin, Kinta (19/08)
Nia akresenta, “Ministériu edukasaun se bele apoiu ami kadeira, meza nomós livru, se di’ak tan aumenta profesór hodi nune’e ami bele hanorin ho di’ak, maibé eskola n’e mós la asesu eletrisidade ne’ebé difikulta tebes ba estudante sira atu estuda kalan,” haktenik Nia.
Entertantu totál estudante iha EBF Aitos, Suku Dato-rua, postu administrativu Fohorem hamutuk 52 no profesór na’in lima, ne’ebé kompostu husi mestre na’in haat no mestra na’in ida.(*)
