Tempotimor (Covalima)-Bazeia ba Eleisaun Prezidensiál no eleisaun Parlamentares ne’ebé sei akontese iha 2022 no 2023 maka governu liuhusi Sekretariadu Tékniku Administrasaun Eleitorál (STAE) prodús ona kartaun eleitorál ba sidadaun sira ne’ebé atinje ona tinan 16 no sira ne’ebé halo atualizasaun iha Timor-Leste.
Ba kestaun ne’e, diretór STAE Munisípiu Covalima, Claudio Cardoso katak, husi fulan Jullu to’o Agostu tinan ne’e, eleitores hamutuk 972 mak simu oa kartaun eleitoral.
“Eleitores potensial atinji tinan 16 ne’ebé mai ona halo kartaun eleitorál iha fulan Jullu hamutuk 530, depois iha Agostu Semana ida ne’e nian hamutuk 130, ne’ebé eleitores foun de’it maka hamutuk 660 depois ba eleitores aktualizadu sira husi Jullu mai Agostu ne’e hamutuk 312,” dehan Claudio ba jornalista sira iha nia knaar fatin Suai, Kinta (26/08).
Diretór ne’e akresenta, loloos iha fulan Jullu halo ona lansamentu ba atendimentu eleitores sira iha postu, maibé politikamente ekipamentus ne’ebé atu distribui ba iha postu sira husi nasionál seidauk mai.
“Preokupasaun barak maka eleitores sira hato’o mai, maibé tuir loloos dia 1 de Jullu ne’e ita halo ona lansamentu ba atendimentu ba eleitores sira iha postu, maibé politikamente ekipamentus ne’ebé atu fahe ba postu sira ne’e to’o agora seidauk mai iha Munisípiu, tamba ne’e maka agora mós ita nafatin hanesan ne’e de’it, maibé ami sei esforsu para oinsa tempu badak bele hahú fali,” Claudio haktuir.
Entertantu diretór STAE munisípiu Covalima ne’e husu ba juventude sira ne’ebé atinji ona tinan 16, atu hakat ba STAE munisípiu Covalima hodi prienxe rekezitus ne’ebé iha hodi bele hetan kartaun eleitorál no ezerse nia direitu iha leisaun demokrásia ne’ebé sei akontese iha tinan 2022 no 2023.(*)
