Tempotimor (Covalima)-Tuir Diretór Servisu Saúde Munisípiu Covalima (SSMC), Filipe Pereira Lemos katak, populasaun munisípiu Covalima ne’ebé simu ona vasina AstraZeneca no Sinovax husi primeira doze no segunda doze hamutuk Rihun 30,211.
“Ita munisípiu Covalima ema ne’ebé foin simu vasina AstraZeneca doze primeiru hamutuk 23,494 no sira ne’ebé kompleta ona segunda doze AstraZeneca hamutuk rihun 5,970, Agora sira ne’ebé simu Sinovac primeira doze iha ema na’in 480 no kompleta ona segundu doze iha ema nain 267, ne’ebé ita sura ema ne’ebé simu vasina AstraZeneca no Sinovac hamutuk rihun 30,211,” dehan diretór Filipe ba www.temporimor.com iha nia knaar fatin Suai, Sesta (27/08).
Nia afirma, vasina ba segundu faze sei kontinua ba sidadaun sira ne’ebé tama ona idade 60 ba leten nomós husi idade 18 ba leten.
“Ita sei kontinua vasina ba segundu fase ba idozu sira no idade 18 ba leten iha ita-nia komunidade sira iha munisípiu Covalima, ne’ebé ita seidauk hatene nia porsentu loloos, tanba sei iha kontinusaun vasina,” Haktenik nia.
Entretantu tuir dadus jerál ne’ebé Ministériu Saúde (MS) fó sai ba públiku iha loron 26 Agosto 2021 katak, Munisípiu Covalima populasaun foin pursentu 14,4% mak simu vasina maibé populasaun pursentu 62.2% mak seidauk simu vasina kontra Covid-19.(*)