Tempotimor (Covalima)-Bazeia ba karta despaixu ne’ebé fó sai husi Ministériu Edukasaun Juventude no Desportu (MEJD) nú. 44/GMEJD/VIII/2021 ne’ebé suspende provizóriu ba atividade aprendisajem iha teritoriu Timor-Leste husi 26 Agostu to’o 09 Setembru 2021 mak halo estudante sira iha Covalima triste ho situasaun ne’e.
Tuir Konsellu Jerál Estudante Eskola Sekundária Jerál Públika (ESGP) Nú. 1 de Suai, Julião Correia husu ba ministériu relevante atu haree problema ne’e, tanba estudante sira estuda lakon ona matéria barak inlkui eskola iha uma la efetivu.
“Ami estudante sira nafatin vítima ba moras Covid-19 no moras ida foun variante Delta ne’e, Tanba moras ida ne’e halo ami eskola lahun la dikin, tanba la kleur eskola la kleur para eskola, ami estudante sira simu vasina kompleitu maibé eskola kontinua paradu semana ida ka rua, at liután to’o fulan, ne’ebe ami husu ministériu relevante se bele buka meius oinsa para rezolve ami estudante iha munisípiu Covalima nia problema,” dehan Julião ba jornalista www.tempotimor.com iha ESJP Suai, Sesta (27/08).
Nia hakle’an, estuda iha uma sei difikulta estudaante barak liu-liu estudante balun ne’ebé hela iha foho,tanba rede komunikasaun ladi’ak balun liña eletrisidade laiha.
“Relasiona ho aprende iha uma, governu tenke hatene, no at liu mak kolega sira ne’ebé hela iha foho, tanba feriadu hanesan ne’e sira ba hotu foho, ho laiha rede telefóoe no parte balun mós seidauk asesu eletrisidade ne’e araska liután,” nia esplika.
Entertantu Relasiona ho moras Covid-19 ho nia variante Delta ne’e afeta tebes eskola iha munisípiu Covalima inklui munisípiu hotu iha Timor-Leste, tanba governu tenke loke taka eskola sira tuir situasaun, alende ne’e estudante iha Eskola Sekundária Jerál Públika nú. 1 Suai hamutuk rihun 2.175, ne’ebé balun simu ona vasina kompleitu.(*)
