Tempotimor (Covalima)- Tuir Diretór Alfandega pontu entrada postu Tilomar, Munisípiu Covalima, Nuno Nogueira katak, husi fulan Juñu to’o Agostu tinan ne’e, Servisu Alfandega Munisípiu Covalima hatama reseitas ba kofre estadu hamutuk $.49,663.71 dolar Amerikanu.
“Maske ita kobra reseitas ne’ebé boot, maibé ita nafatin kumpri regras, ne’ebé ita ko’alia ba taxa fulan juñu nian ita konsege kobra $17,060.44, depois fulan jullu nian $15,152.21 no fullan agostu $17,451.06. nune’e taxa hirak ne’e kontribuisaun husi emprezáriu lokál sira ne’ebé deklara sira-nia sasan,” dehan Diretór Alfandega ne’e ba média sira iha nia knaar fatin, Tersa (31/08)
Diretór ne’e akresenta, bainhira kontu husi fulan fevereiru 2021 to’o agostu tinan ne’e atinje ona taxa hamutuk $95.485,48 dollar Amerikanu, nune’e kompara karik taxa ba tinan ne’e sa’e maka’as kompara ho tinan kotuk.
“Tinan ne’e ita hare taxa ne’e boot los kompara ho tinan uluk ne’e, tamba agora foin agostu de’it atinji ona $95.448,48, dalaruma tinan ne’e hotu bele tama to’o $250.000,” katak nia.
Entertantu durante fulan juñu to’o agostu 2021, kareta hamutuk 159 maka lori sasan tama mai liuhusi pontu entrada Salele, nune’e husi totál kareta ne’e kompostu husi fulan juñu 47, fulan jullu 65 no fulan Agostu 47.(*)
