Tempotimor (Covalima)-Tuir xefe Aldeia Ai-Oan, Manuel Amaral ba www.tempotimor.com liuhusi via telefone katak, komunidade aldeia Ai-Oan hetan plástiku rua no karon rua iha du’ut laran, ne’ebé falun hamutuk no nakonu ho ran, nune’e ita deskonfia ema mak soe bebé.
“Molok ami haree, iha iha loron rua ka tolu liu ba komunidade sira hetan ona, maibé sira hanoin ema mak soe animal ruma, entaun sábadu ne’e ha’u ba haree no haruka ema kore, entaun ami haree hanesan ema-nia ran abortus maka soe hela iha ne’ebá, maibé ami la hatene los katak ne’e animal ka ema, só ami deskonfia ema, tamba ema falun metin iha plástiku boot rua ho karon rua depois mesak ran de’it, tamba ne’e maka ami deskonfia ba ema ne’e,” dehan xefe Aldeia Ai-Oan ne’e dehan liuhusi via telefone, Tersa (31/08)
Hafoin hetan raan ne’e, xefe aldeia hamutuk ho komunidade sira loke no haree kedas, maibé ran refere belit malu loos ona, entaun labele define ne’e ema ka animál.
“Ami konsege loke duni hodi haree, depois fakar tiha ran ne’e ba ami-nia kamiza ida, maibé ita hatene katak ran ne’e la’ós bebé, maibé ita hatene ran ne’e durante fulan tolu hansan ne’e, tamba belit malu los ona ho plastikiu ne’e,” katak nia.
Entretantu nia hamutuk ho komunidade sira la informa ba parte seguransa, tanba seidauk hatene klaru, nune’e sira deside hodi halo ona serimónia funerál iha sábadu liubá.
“Ami la fó hatene ba autoridade lokál sira no parte seguransa sira, tamba ita deskonfia de’it, la hatene katak ne’e ema ga animal, ne’e maka iha momentu ne’ebá kedas ami hakoi, katak ida ne’e ema mós ita tenke hakoi, animal mós ita tenke hakoi, ne’ebé ami falun tiha ho ami nia kamiza ida ami ke’e rai kuak pois hakoi, loraik ne’e ami sunu lilin depois kari aifunan,” Nia esplika.(*)
