Tempotimor (Covalima)-Komunidade Lakalese aldeia Natardik Suku Datotolu, postu administrativu Fohorem, munisípiu Covalima durante tinan 20 ona la asesu ba bee-moos.
Ba kestaun ne’e xefe Aldeia Natardik, Jorge dos Santos rekoñese katak durante tinan barak ona mak komunidade lakalese seidauk konsumu bee-moos.
“Sim, ha’u-nia komunidade Lakalese ne’e sub-aldeia, aldeia mak Natardik, suku Datotolu seidauk hetan duni bee-moos, durante ne’e sira konsumu duni bee mota ho distánsia ne’ebé dook tebes, ami xefe aldeia ne’e hato’o bei-beik ba sira iha suku no postu depois sira hatutan informasaun ne’e ba nai ulun sira, maibé la hetan responde atu halo nusa,” dehan xefe aldeia ne’e ba www.tempotimor.com liuhusi via telefone, Tersa (31/08).
Iha fatin seluk reprezentante estudante Eskola Filiál Lakalese, Romana Soares Amaral (klase 5) katak, husi tempu ne’ebé Timor-Leste ukun aan to’o agora, komunidade Lakalese seidauk asesu bee-moos, entaun durante ne’ekomunidade sira konsumu de’it bee matan ida iha mota Tafara.
“Ami durante tinan barak ona mak seidauk asesu bee-moos, sorte bee oan ne’e sei sai, maibé iha tempu bailoron hanesan ne’e sai ki’ik-oan loos, ne’ebé ami kuru bee iha mota no lalin ho motor, araska liu ba sira ne’ebé mak laiha transporte hanesan motorizada ne’e hein bee no to’o kalan ka dalaruma ami hadau se mak dader hader uluk nia kuru uluk, se mak tarde kuru bee iha mota, maibé ne’e ba sira ne’ebé mak iha motor,” nia dehan.
Estudante ne’e sente triste no husu ba governu atu rezolve problema ne’ebé durante ne’e sira infrenta.
“Ami triste tebes, tanba ami parte foho ne’e bee-hun, maibé laiha ema atu buka dalan hodi dada bee-mos mai hodi ami asesu, no ami laiha kbi’it atu dada bee ne’e tanba distánsia dok tebes,katak Romana.
Entertantu aldeia Natardik, suku Datotolu, postu Fohorem, munisípiu Covalima iha populasaun 200-resin no sub-aldeia Lakalese iha xefe família 30-resin.(*)
