Tempotimor (Covalima)-Ssxta-feira (03/09/2021) ne’e Administradór Munisípiu Covalima (AMC), Fransisco de Andrade ofisialmente fó pose ba administradór postu administrativu Suai no administradór postu administrativu Zumalai, munisípiu Covalima.
Iha serimónia toma pose ne’e, administradór munisípiu Covalima dehan, simu knaar nu’udar administradór postu administrativu la’ós atu sai liurai, maibé atu sai atan no serví ba povu.
“Simu knaar la’ós oportunidade maibé responsabilidade atu serví ba povu no labele haree ba kor ka rasa, maibé servisu hanesan Timoroan hatudu honestidade no transparánsia, komesa husi ohin ba oin,” Hateten AMC Fransisco liuhusi nia diskursu hafoin fó pose ba administradór postu na’in rua ne’e iha salaun administrasaun Suai, Sesta (03/09).
Entretantu iha serimónia espesiál ne’e, administradór postu Zumalai, Rui dos Santos no administradór postu Suai Luzinho do Rego jura ba Maromak no povu Timor-Leste liu-liu munisípiu Covalima katak sei hala’o knaar tuir lei no normas ne’ebé vigora iha Timor-Leste.
Entretantu serimónia toma pose ne’ebé hala’o iha salaun administrasaun munisípiu Covalima ne’e hetan partisipasaun máximu husi autoridade lokál no postu administrativu inklui setorais sira hotu iha Munisípiu Covalima.(*)
