Tempotimor (Covalima)-Haree ba knaar ne’ebé governu liuhusi Ministériu Administrasaun Estatál (MAE) atribui ba Luzinho do Rego nu’udar Administradór ba postu administrativu Suai, maka nia promete sei rezolve preokupasaun povu Suai nian durante nia mandatu.
“Ohin simu knaar atu serví povu, tanba antes ne’e mós ha’u servisu iha administrasaun postu Suai hanesan Ofisiál Governu Lokál (OGL), ne’ebé iha ha’u nia tempu ne’e sei rezolve komunidade sira-nia preokupasaun kona-ba bee-moos, estrada no seluk tan. Tanba sira ne’e tama ha’u-nia planu prioridade durante mandatu,” dehan administradór foun postu Zumalai ne’e ba www.tempotimor.com iha Salaun Administrasaun Covalima hafoin simu pose husi Administradór Munisípiu Covalima, Sesta (03/09).
Nia mós promete katak, sei halo levantamentu ba dadus sira hodi aprezenta iha administrasaun munisípiu no sei hadi’a mekanizmu no regras servisu iha postu Suai.
Iha sorin seluk administradór sesante husi Postu Administrativu Suai, Caetano dos Santos felisita ba administradór foun na’in rua ne’ebé ohin simu ona pose.
“Agradese tebes ba kolega administrador foun na’in rua, ne’ebé ohin sai ona hanesan administradór postu Suai no postu Zumalai, atu kontinua koopera, servisu di’ak liután, hodi nune’e bele hasai komunidade sira husi nakukun ba naroman husi buat ne’ebé iha ami-nia mandatu ami seidauk hala’o hotu karik, husu kolega na’in rua atu kontinua hodi haforsa liu tan,” katak Nia.
Nia mós husu ba administradór atuál atu hamoris liután Programa Mão-de-Obra ne’ebé la’o inklui halo parseiru di’ak ho sosiedade sivíl nomós governu.
Administradór sesante hakle’an katak, kontinua konserva no kuidadu nafatin patrimóniu estadu nian ne’ebé iha postu Zumalai no Suai atu nune’e bele eziste ba tempu naruk, hodi jerasaun sira bele hatene.(*)
