Tempotimor (Covalima)-Relasiona ho trazédia ne’ebé akontese iha loron 6 Setembru 1999 iha igreja Suai ne’ebé koñesidu ho Setembro Negro, mak komunidade Covalima hanoin hikas loron ne’ebá liuhusi kari ai-funan no sunu lilin iha monumentu Masakre Setembru Negro Suai 1999 ne’ebé komeora ba dala-XXII.
Iha reflesaun ne’e, reprezentante familia Rodolfo da Cruz espresa nia sentimentu triste tanba momentu ne’ebá mak milisia sira oho nia fen ho oan iha igreja laran.
“Triste tebes ho akontesimentu momentu ne’ebá, milisia oho amu na’in tolu no povu barak mak mate ba rai ida ne’e no ha’u-nia ferik oan nomós oan sira mate hotu, husi milisia sira, ho ida ne’e loron ohin ita hotu mai hodi relembra akontesimentu ne’e sunu lilin no kari aifuan ba ita-nia matebian sira ne’ebé lakon vida ba rai ida ne’e,” dehan Rodolfo ba www.tempotimor.com iha monumentu Maskre Setembro Negro, Segunda (06/09).
Nia mós husu ba governu atu konsidera loron Masacre Setembru Negro Suai, tanba padre na’in tolu hanesan Pe. Hilário Madeira, Pe. Francisco Soares no Pe. Tarcicios Dewanto inklui povu lubuk ida mak mate iha fatin refere tanba defende timor-Leste nia ukun rasik aan.
“Governu tenke konsidera mós loron ida ne’e, tanba ita-nia padre na’in tolu ho komunidade barak mak mate no barak mak kanek no barak mak la hetan sira nia rate to’o agora, maibé tanba Covid-19 ohin ita mai kari de’it mak ai-funan no sunu lilin,” nia hakotu.
Entertantu komemorasaun loron Masakre Setembru Negro Suai 1999 ba dala XXII ne’e hetan partisipasaun máximu husi família matebian sira husi munisípiu Covalima. Alende ne’e observasaun www.tempotimor.com iha terenu nota katak, edifísiu hotu iha munisípiu Covalima iha parte dader nian taka hotu, tanba funsionáriu no sosiedade sivíl hotu ba partisipa loron importante refere.(*)
