Tempotimor (Covalima)-Hanoin ba trajédia ne’ebé akontese iha 7 de Setermbu 1999 iha postu adminsitrativu Zumalai ne’ebé hamate joven na’in sia iha fatin refere, maka familia matebuian sira husu governu atu rekoñese trajédia refere, tanba joven sira ne’e mate tanba defere rai doben Timor-Leste.
Hanoin loron istóriku ne’e, komunidade postu administrativu Zumalai halibur malu hodi sunu lilin iha sede suku Lour, no kari aifuan ba matebian sira nia rate, ba matebian na’in sia ne’ebé hetan oho husi Mati Hidup Dengan Indonesia (Mahidi) no Laksanakan Sapurata (Laksaur) iha loron 7 fulan de Setembru 1999 iha iha suku Lour no balu iha igreja Suai.
Iha situasaun ne’e, responsável Komandu Joven Loro Monu (KJLM), Gaspar Bragansa katak, joven na’in tolu mate iha suku Lour no seluk mate iha igreja Suai, defende Timor-Leste, tanba ne’e husu ba governu atu konsidera loron ne’e sai hanesan istóriku mós.
“Sira na’in sia mate tanba husi Laksaur no Mahidi mak oho iha suku Lour no sira seluk iha igreja Avé Maria Suai, tanba ne’e ami husu Konsellu Veteranus Munisípiu Covalima atu konsidera, tanba sira mate ba rai ida ne’e, ha’u triste tebes bainhira sira la marka prezensa iha ne’e, entau ami konta ba se? no se mak atu rona ami nia istória ne’e,” dehan Gaspar ba jornalista sira iha sede suku Lour hafouin sunu sunu lilin no kari ai-funan iha saudozu sira-nia rate, Tersa (07/09).
Responsável KJLM ne’e afirma, matebian na’in sia ne’e naran rejista ona naran ba verifikasaun dadus veteranus munisípiu Covalima iha tinan 2009.
“Ha’u hanesan responsável nafatin apoiu ba família sira, tanba sira-nia luta mak ohin loron ita hetan ukun rasik aan, ita nafatin konsidera sira-nia luta ba rai ida ne’e, to’o ohin loron sira la hamutuk ho ita, no husu familia sira tenke hakerek no ita hotu iha ne’e tenke hakerek istória sira-nia luta ne’e, para estadu bele hatene,” nia tenik.
Entertantu nia mós dehan, kada tinan komunidade postu administrativu Zumalai selebra loron trajédia iha suku Lour ne’e liuhusi sunu lilin no kari ai-funan atu fanun jerasaun foun sira kona-ba oinsá luta Timor-Leste nian ba ukun rasik aan.(*)
