Tempotimor (Covalima)-Kuarta-feira (08/09/2021) ohin, Ministru Justisa (MJ) Manuel Cárceres alerta ona ba guarda prizoneiru sira iha munisípiu Covalima katak, iha tempu badak guarda prizional sira iha munisípiu Covalima, Dili no Ermera sei hetan subsídiu liña frente nian husi governu.
“Horikalan ha’u orienta ona señora diretora jerál ho Señor Diretór Servisu Prijionais Administrasaun Sosial nian atu aprezenta lista guarda prizional sira nian, atu husu subsídiu frontline nian husi governu,” katak MJ liuhusi nia Diskursu hafoin hala’o vizita ba pruzaun Suai, Kuarta (08/09).
Governante ne’e mós afirma, kona-ba subsídiu frontline ba guarda prizional sira nian aprezenta ona ba Konsellu Ministru (KM) atu aprova, tanba lei ne’ebé Prezidente Repúblika (PR) aprova katak guarda prizonal sira mós hola parte ba ekipa frontline.
“Imi-nia direitu imi hato’o mai ha’u, depois ha’u hato’o ba Konsellu Ministru aprova, no señor Prezidente Repúblika promulga katak, imi guarda prizional mós frontline hasoru pandemia Covid-19 ida ne’e,” Nia dehan.
Mimistru justisa ne’e mós husu ba guarda prizional sira atu honestu iha direitu ba frontline nian, atu nune’e governu bele fó remuneratóriu ba gurda prizional sira tuir turnu.
“Ha’u rekomenda ona ba DJ no DSPAS katak, ha’u presiza honestidade, ema ne’ebé servisu turnu ne’e sei selu tuir nia servisu turnu ne’e, depois ida ne’ebé deskansa iha uma labele aproveita oportunidade, la’ós hatodan ema seluk depois ita goja ne’e labele, guarda przional hotu-hotu simu maibé ha’u presiza honestidade, atu nune’e sai sasukat atu halo avaliasaun dezempeñu ba ita-boot sira,” katak MJ.(*)
